સુવર્ણ લગ્ન વર્ષગાંઠ – સેવા સમર્પણનો સોનેરી પ્રસંગ

રિપોર્ટ : સતીશ બી. પાંડે | ગુજરાત પ્રવાસી ન્યૂઝ

સૌરાષ્ટ્રના સાવરકુંડલા શહેરના પનોતા પુત્ર અને સેવા-પરોપકાર માટે હંમેશા તત્પર રહેતા શ્રી હરેશભાઈ મહેતા માટે 26 ફેબ્રુઆરી 2026નો દિવસ એક અનોખો અને ગૌરવપૂર્ણ પ્રસંગ બની રહ્યો. હરેશભાઈ મહેતા અને તેમની ધાર્મિક તથા સેવાભાવી જીવનસાથી શ્રીમતી યશોધરાબેન મહેતાએ પોતાના સુખી, સાત્વિક અને લોકસેવા માટે સમર્પિત વૈવાહિક જીવનના 50 વર્ષ પૂર્ણ કર્યા.

જીવનના આ અમૂલ્ય પડાવે પણ તેમણે વ્યક્તિગત ઉજવણી કરતા સમાજસેવાને પ્રથમ સ્થાન આપીને એક અનોખું ઉદાહરણ પૂરું પાડ્યું, જે સમગ્ર સમાજ માટે પ્રેરણારૂપ બની રહ્યું છે.

સેવા જ સાચી ઉજવણી

આ સુવર્ણ અવસરને યાદગાર બનાવવા માટે હરેશભાઈ મહેતાએ શ્રી વિદ્યાગુરુ ફાઉન્ડેશન સંચાલિત “શ્રી લલુભાઈ શેઠ આરોગ્ય મંદિર”, સાવરકુંડલા ખાતે સારવાર લઈ રહેલા દર્દીઓની સેવા માટે મુંબઈમાં એક ભવ્ય મ્યુઝિકલ કાર્યક્રમનું આયોજન કર્યું હતું.

આ કાર્યક્રમમાં પ્રખ્યાત લોકગાયક ઓસમાણ મીર અને તેમના પુત્ર આમીર મીર દ્વારા ભાવભીની અને સંગીતમય રજૂઆત કરવામાં આવી, જેમાં ઉપસ્થિત મહેમાનોને સંગીત સાથે સેવા અને પરોપકારનો સંદેશ પણ મળ્યો.

ભેટ નહીં, સેવા માટે અર્પણ

આ પ્રસંગે હરેશભાઈ મહેતાએ પોતાના માટે કોઈપણ પ્રકારની ભેટ સ્વીકારવાને બદલે તમામ ભેટ અને દાનની રકમ “શ્રી લલુભાઈ શેઠ આરોગ્ય મંદિર”ને અર્પણ કરવાની અપીલ કરી.

આ વિચાર માત્ર ઉજવણી નહીં પરંતુ સમાજસેવાનો અનોખો સંદેશ આપતો હોવાથી ઉપસ્થિત મહાનુભાવો દ્વારા પણ તેનો હર્ષોલ્લાસથી સ્વીકાર કરવામાં આવ્યો.

મોરારીબાપુએ વ્યક્ત કર્યો આશીર્વાદ

વિશ્વવંદનીય પરમ પૂજ્ય સંત શ્રી મોરારીબાપુ વ્યસ્ત કાર્યક્રમોને કારણે કાર્યક્રમમાં હાજર રહી શક્યા નહોતા, પરંતુ તેમણે હરેશભાઈ મહેતાના આ પવિત્ર વિચારને વધાવીને પોતાની પ્રસન્નતા વ્યક્ત કરી.

મોરારીબાપુએ આશીર્વાદ સ્વરૂપે પાંચ મિનિટની વિડિયો ક્લિપ મોકલી, જેમાં તેમણે હરેશભાઈના સેવા અને પરોપકારના ભાવને અભિનંદન આપ્યા.

બે કરોડથી વધુ દાન એકત્રિત

મુંબઈમાં 24 ફેબ્રુઆરી 2026ના રોજ યોજાયેલા આ કાર્યક્રમમાં અત્યાર સુધીમાં બે કરોડ રૂપિયાથી વધુ દાનની રકમ એકત્રિત થઈ છે. નોંધનીય બાબત એ છે કે દાનનો પ્રવાહ હજુ પણ ચાલુ છે અને આ સમગ્ર રકમ શ્રી લલુભાઈ શેઠ આરોગ્ય મંદિરના વિકાસ અને દર્દીઓની સેવા માટે વપરાશે.

જાહેર અપીલ

સાવરકુંડલાના આવા સેવાભાવી પુત્રના પવિત્ર અવસરે સમગ્ર સાવરકુંડલા શહેર, પંથક તથા સમગ્ર સૌરાષ્ટ્રની જનતાને એક ભાવસભર અપીલ કરવામાં આવી છે.

સમાજના ભામાશાઓ અને સેવાભાવી નાગરિકોને વિનંતી કરવામાં આવી છે કે –
“ફૂલ નહીં તો ફૂલની પાંખડી” રૂપે શ્રી હરેશભાઈ મહેતાની 50મી લગ્ન વર્ષગાંઠ નિમિત્તે શ્રી લલુભાઈ શેઠ આરોગ્ય મંદિરને આપનો યથાશક્તિ સહયોગ અર્પણ કરો.

આવો, આપણે સૌ મળીને આ સુવર્ણ અવસરને સમાજસેવાના સોનેરી અધ્યાયમાં પરિવર્તિત કરીએ.