સાવરકુંડલામાં સંતોના સાનિધ્યમાં સનાતન સંસ્કૃતિનો પ્રગટ ઉત્સવ

માતૃ-પિતૃ પૂજન અને ગૌ-વંદનાથી ભારતીય સંસ્કારોનું અનોખું સિંચન

સાવરકુંડલા:
રાષ્ટ્રીય સ્વયંસેવક સંઘના શતાબ્દી વર્ષમાં મંગલ પ્રવેશના ઐતિહાસિક અવસરે સાવરકુંડલાની પુણ્યશાળી ધરતી પર કબીર ટેકરી (સંત કબીર વસ્તી) ખાતે સંત સમિતિ અને વિરાટ હિન્દુ સંમેલન સમિતિ દ્વારા આયોજિત “વિરાટ હિન્દુ સંમેલન” દિવ્ય અને ભવ્ય માહોલમાં સંપન્ન થયું. સમગ્ર નગરનો હિન્દુ સમાજ જાતિ-જ્ઞાતિના ભેદભાવ ભૂલી એકતાના સૂત્રે બંધાયો.

વડીલ વંદના અને સંસ્કાર સિંચન

સનાતન પરંપરામાં વડીલો દેવતુલ્ય ગણાય છે—આ ભાવનાને ચરિતાર્થ કરતા સંમેલનમાં ૧૦૦ વર્ષ કે તેથી વધુ વય ધરાવતા શતાયુ વડીલોનું ભાવપૂર્વક પૂજન અને સન્માન કરવામાં આવ્યું. નવી પેઢીમાં સંસ્કારોનું બીજ રોપવા બાળકો દ્વારા માતૃ-પિતૃ પૂજન અને ગૌ-વંદનાનો વિશેષ કાર્યક્રમ યોજાયો.

ભક્તિમય આરંભ, ‘રામમય’ વાતાવરણ

કાર્યક્રમના આરંભે શ્રી કૌશિક બાપુએ સંગીતમય હનુમાન ચાલીસા પાઠથી સમગ્ર વાતાવરણને ભક્તિમય બનાવ્યું. આ અવસરે શ્રી હિતેશભાઈ શેઠ દ્વારા હનુમાનજીની જીવંત ઝાંખી રજૂ થઈ—દરશકો ભાવવિભોર બન્યા.

‘પંચ પરિવર્તન’નો સંદેશ

બાળ સ્વયંસેવકો દ્વારા સમાજ પરિવર્તનના પાંચ આધારસ્તંભ ‘પંચ પરિવર્તન’—

• સામાજિક સમરસતા

• પર્યાવરણ સંરક્ષણ

• કુટુંબ પ્રબોધન

• સ્વદેશી ભાવ

• નાગરિક કર્તવ્ય
  —પર અસરકારક રીતે પ્રકાશ પાડવામાં આવ્યો.

સંતોના આશીર્વચન અને માર્ગદર્શન

પરમ પૂજ્ય મહામંડલેશ્વર મસ્તરામ બાપુ સહિત વિદ્વાન સંતોએ આશીર્વચનમાં જણાવ્યું કે હિન્દુ ધર્મ વિશ્વ કલ્યાણનો માર્ગ છે. તેમણે પરિવારિક સંવાદ મજબૂત બનાવવા સાંજનું ભોજન પરિવાર સાથે, ફોન-ટીવીથી દૂર રહી લેવા પર ખાસ ભાર મૂક્યો. બાદમાં સંઘના જિલ્લા કાર્યવાહ શ્રી આકાશભાઈ પંડ્યાએ સંઘની ૧૦૦ વર્ષની રાષ્ટ્ર સેવા અંગે માર્ગદર્શન આપ્યું.

સાંસ્કૃતિક રજૂઆતો અને સમરસ ભોજન

ગોપી મહિલા મંડળના કીર્તન અને નિવિદ્યા સ્કૂલના બાળકોની નાટિકા (પર્યાવરણ અને રાષ્ટ્રપ્રેમ વિષયક) સૌના મન મોહી ગઈ.
અયોધ્યાની અખંડ જ્યોતની મહાઆરતી અને સરયુ જળના પવિત્ર પૂજન બાદ હજારો નગરજનોએ એકસાથે પંગતમાં બેસીને સમરસતા ભોજન (મહાપ્રસાદ) ગ્રહણ કર્યો.

એકતા અને અખંડિતતાનો સંદેશ

સંત સમિતિના અધ્યક્ષ મહંત શ્રી નારાયણ સાહેબના માર્ગદર્શન હેઠળ યોજાયેલ આ સંમેલને સમાજમાં એકતા, સંસ્કાર અને અખંડિતતાનો બળકટ સંદેશ પાઠવ્યો. વિરાટ હિન્દુ સંમેલન સમિતિ, સ્થાનિક સ્વયંસેવકો અને નગરજનોએ રાત-દિવસ જહેમત ઉઠાવી આ દિવ્ય આયોજનને સફળ બનાવ્યું.

બ્યુરો ચીફ: સતીષ બી. પાંડે