આજે સમગ્ર દેશ ૭૭મા પ્રજાસત્તાક પર્વના રંગે રંગાયેલો હતો ત્યારે ગીર (પૂર્વ) વન વિભાગ-ધારી દ્વારા રાષ્ટ્રપ્રેમ અને પર્યાવરણ જતનના ઉમદા ઉદ્દેશ્ય સાથે આ પર્વની ભવ્ય ઉજવણી કરવામાં આવી. આંબરડી સફારી પાર્ક ખાતે આયોજિત કાર્યક્રમમાં વન વિભાગના અધિકારીઓ, કર્મચારીઓ, સ્થાનિક આગેવાનો તથા વિદ્યાર્થીઓએ ઉત્સાહભેર ભાગ લીધો.
કાર્યક્રમના મુખ્ય અતિથિ વિકાસ યાદવ, નાયબ વન સંરક્ષકશ્રી, ગીર (પૂર્વ)-ધારીના હસ્તે સવારે ૮:૩૦ કલાકે ધ્વજવંદન કરવામાં આવ્યું. તેમણે સંદેશ આપતા જણાવ્યું કે, “રાષ્ટ્ર સર્વોપરી છે અને જીવમાત્રનું રક્ષણ કરવું એ આપણી પાયાની ફરજ છે.” તેમણે ઉમેર્યું કે સમગ્ર ભારતમાં એશિયાઈ સિંહોની સૌથી વધુ સંખ્યા અમરેલી જિલ્લામાં છે, જે વન વિભાગની અવિરત મહેનત અને પ્રજાના સહયોગનું ઉત્તમ પરિણામ છે.
આ ઉજવણીની વિશેષતા વન વિભાગ અને જંગલના પરંપરાગત રક્ષક એવા માલધારી સમુદાય વચ્ચેની મિત્રતાનું દૃશ્યમાન પ્રતિબિંબ હતું. મંચ પર **નાથાભાઈ માલધારી**ને વિશેષ સ્થાન આપી માલધારી સમુદાય પ્રત્યે સન્માન વ્યક્ત કરવામાં આવ્યું. આ પ્રસંગે માનદ વાઇલ્ડ લાઈફ વોર્ડન મહાવીર બાપુ, ACF પી. એન. ચાંદુ, એન. પી. લકુમ તેમજ ગીર (પૂર્વ)ના RFO સહિતના અધિકારીઓ ગણવેશમાં હાજર રહ્યા.
કાર્યક્રમ દરમિયાન શ્રેષ્ઠ કામગીરી કરનાર કર્મચારીઓ, પર્યાવરણ સંરક્ષણ ક્ષેત્રે કાર્યરત સ્વૈચ્છિક સંસ્થાઓ (NGOs) અને પત્રકાર મિત્રોને પ્રશંસા પત્ર તથા મોમેન્ટો આપી સન્માનિત કરવામાં આવ્યા. વિવિધ શાળાના વિદ્યાર્થીઓએ દેશભક્તિ અને પર્યાવરણના સંદેશ સાથે મનમોહક સાંસ્કૃતિક કૃતિઓ રજૂ કરી.
આ ઉજવણીમાં સામાજિક આગેવાનો, રહીશો, એનજીઓ અને મોટી સંખ્યામાં શાળા-કોલેજના વિદ્યાર્થીઓએ હાજરી આપી “પર્યાવરણની સુરક્ષા એ જ આપણી જવાબદારી” નો સંકલ્પ લીધો. સમગ્ર કાર્યક્રમે રાષ્ટ્રીય એકતા સાથે વન્યજીવ સંરક્ષણનો મજબૂત સંદેશ આપ્યો.
રિપોર્ટ: સતીશ બી. પાંડે
ગુજરાત પ્રવાસી ન્યૂઝ, અમદાવાદ
