સાવરકુંડલામાં ‘ભગિની સેવા મંડળ’ દ્વારા આંતરરાષ્ટ્રીય મહિલા દિવસની ભવ્ય ઉજવણી

સાવરકુંડલા | ગુજરાત પ્રવાસી ન્યૂઝ

આંતરરાષ્ટ્રીય મહિલા દિવસ નિમિત્તે સાવરકુંડલાની જાણીતી સામાજિક સંસ્થા ‘ભગિની સેવા મંડળ’ દ્વારા નારી શક્તિના સન્માનમાં ભવ્ય કાર્યક્રમનું આયોજન કરવામાં આવ્યું હતું. આ પ્રસંગે મહિલા સશક્તિકરણ અને જાગૃતિનો સંદેશ આપવામાં આવ્યો હતો અને સંસ્થાના હોદ્દેદારો તથા બહેનો મોટી સંખ્યામાં ઉપસ્થિત રહ્યા હતા.

કાર્યક્રમના અધ્યક્ષ સ્થાને સંસ્થાના પ્રમુખ રૂપલબેન પી. ત્રિવેદી ઉપસ્થિત રહ્યા હતા. તેમની સાથે મેનેજિંગ ટ્રસ્ટી નીલાબેન વાઘાણી તેમજ ટ્રસ્ટીઓ નીરૂબેન સોની અને મનીષાબેન ધોળકિયા સહિતના મહાનુભાવોએ દીપ પ્રાગટ્ય કરીને કાર્યક્રમનો શુભારંભ કર્યો હતો.

કાર્યક્રમ દરમિયાન વિવિધ વક્તાઓએ નારી ઉત્થાન, મહિલા સશક્તિકરણ અને સમાજમાં મહિલાઓના મહત્વ વિશે પ્રેરણાદાયી વક્તવ્યો આપ્યા હતા. સંસ્થાની છાત્રાલયમાં રહેતી દીકરીઓ અને અન્ય સામાજિક સંસ્થાઓની બહેનોએ પણ આ ઉજવણીમાં ઉત્સાહભેર ભાગ લીધો હતો.

આ ખાસ અવસરે રૂપલબેન પી. ત્રિવેદી, નીલાબેન વાઘાણી, દર્શનાબેન માલાણી અને ક્રિષાબેન ત્રિવેદી દ્વારા કેક કાપીને મહિલા દિવસની આનંદમય ઉજવણી કરવામાં આવી હતી.

સંસ્થાના પ્રમુખ રૂપલબેન ત્રિવેદીએ જણાવ્યું હતું કે મહિલાઓ આત્મનિર્ભર બને અને શિક્ષણ દ્વારા સમાજમાં પોતાનું સ્થાન મજબૂત બનાવે, એ જ મહિલા દિવસની સાચી ઉજવણી છે. જ્યારે નીલાબેન વાઘાણીએ સંસ્થાની વિવિધ પ્રવૃત્તિઓ અને મહિલાઓના સર્વાંગી વિકાસ માટે કરવામાં આવતા પ્રયાસોની માહિતી આપી હતી.

આ સમગ્ર કાર્યક્રમનું સુંદર આયોજન અને વ્યવસ્થાપન ભગિની સેવા મંડળના ટ્રસ્ટીશ્રીઓ અને સભ્ય બહેનો દ્વારા કરવામાંઆવ્યું હતું.

રિપોર્ટ:
સતીશ બી. પાંડે
બ્યુરો ચીફ, ગુજરાત પ્રવાસી ન્યૂઝ – સાવરકુંડલા