મહાપ્રબંધક પશ્ચિમ રેલવે દ્વારા અમદાવાદ મંડળના કર્મચારી રામરાજ મીણાને સંરક્ષા પુરસ્કાર

બ્યુરો રિપોર્ટ | ગુજરાત પ્રવાસી ન્યૂઝ | અમદાવાદ

પશ્ચિમ રેલવેના મહાપ્રબંધક રામાશ્રય પાંડે દ્વારા અમદાવાદ મંડળના કર્મચારી રામરાજ મીણા ને તેમના ઉત્કૃષ્ટ કાર્ય, સતર્કતા અને સુરક્ષિત ટ્રેન સંચાલનમાં આપેલા મહત્વપૂર્ણ યોગદાન બદલ “મેન ઓફ ધ મન્થ” (એપ્રિલ–2026) સંરક્ષા પુરસ્કાર એનાયત કરવામાં આવ્યો છે. આ સન્માન તેમના દ્વારા ફરજ દરમિયાન દર્શાવવામાં આવેલી અસાધારણ જાગરૂકતા અને સુરક્ષા પ્રત્યેની પ્રતિબદ્ધતાને માન્યતા આપતું મહત્વપૂર્ણ સન્માન છે.

મળતી માહિતી મુજબ, શ્રી રામરાજ મીણા ગાંધીધામના બીજી યાર્ડમાં એમ.સી.એફ. (MCF) તરીકે ફરજ બજાવે છે. તેમની મુખ્ય જવાબદારી ગાંધીધામમાંથી પસાર થતી માલગાડીઓ અને યાત્રી ટ્રેનોનું રોલિંગ-ઇન તથા રોલિંગ-આઉટ પરીક્ષણ કરવાની છે, જેથી ગાડીઓની સલામતી સુનિશ્ચિત થઈ શકે.

તા. 4 એપ્રિલ, 2026ના રોજ ફરજ દરમિયાન તેમણે ટ્રેન નંબર DWLP/MDCC/Cont.ના લોકોમોટિવથી 11મા ક્રમે આવેલા વેગનના R-4 વ્હીલમાં અસામાન્યતા નિહાળી હતી. તેમની તીક્ષ્ણ નજરે વ્હીલમાં સંભવિત તકનીકી ખામીની ઓળખ થતાં તેમણે વિલંબ કર્યા વગર ટ્રેન મેનેજરને જાણ કરી અને ગાડીને તાત્કાલિક અટકાવવાની કાર્યવાહી કરાવી હતી.

ત્યારબાદ કરવામાં આવેલી તપાસમાં જાણવા મળ્યું કે વેગનમાં લાગેલા CTRB (કાર્ટ્રિજ ટેપર રોલર બેરિંગ)ની ગ્રીસ સીલ ખસી ગઈ હતી. આ પ્રકારની ખામી સમયસર ધ્યાનમાં ન આવે તો ટ્રેન સંચાલન માટે ગંભીર જોખમ ઊભું થઈ શકે છે. રેલવે અધિકારીઓ દ્વારા વિસ્તૃત નિરીક્ષણ અને જરૂરી સુરક્ષા પગલાં લેવામાં આવ્યા બાદ ગાડીને એસ્કોર્ટિંગ તથા નિયંત્રિત ગતિ સાથે બીજી યાર્ડ સુધી લઈ જવામાં આવી હતી. બાદમાં સંબંધિત વેગનને સિક લાઇનમાં અલગ કરીને વ્હીલ બદલવાની કાર્યવાહી હાથ ધરવામાં આવી હતી.

રેલવે અધિકારીઓએ જણાવ્યું કે શ્રી રામરાજ મીણાની સતર્કતા અને ફરજ પ્રત્યેની નિષ્ઠાના કારણે એક સંભવિત ગંભીર દુર્ઘટના ટાળી શકાયી હતી. તેમની સમયસરની સૂચના અને જવાબદારીપૂર્ણ વલણને કારણે તાત્કાલિક કાર્યવાહી શક્ય બની અને ટ્રેન સંચાલનની સુરક્ષા જળવાઈ રહી.

પશ્ચિમ રેલવે દ્વારા આપવામાં આવેલ આ સંરક્ષા પુરસ્કાર માત્ર વ્યક્તિગત સન્માન નથી, પરંતુ રેલવે કર્મચારીઓમાં સુરક્ષા પ્રત્યેની જાગૃતિ, જવાબદારી અને સમર્પણની ભાવનાને વધુ મજબૂત બનાવે છે. શ્રી રામરાજ મીણાની કામગીરી રેલવે સેવામાં સુરક્ષા સર્વોપરી હોવાનો સંદેશ આપે છે અને અન્ય કર્મચારીઓ માટે પણ પ્રેરણારૂપ બની છે.

 બ્યુરો રિપોર્ટ, ગુજરાત પ્રવાસી ન્યૂઝ, અમદાવાદ