સાવરકુંડલાની જનતા માટે આશીર્વાદરૂપ બન્યું ૪૦ વર્ષ જૂનું ‘ઉતાવળ હનુમાનજી પાણીનું પરબ’ વર્ષ ૧૯૮૬થી અવિરત ચાલી રહી છે નિઃસ્વાર્થ જળસેવા, ૧૮ વર્ણના લોકો માટે બની માનવતાનું જીવંત પ્રતિક

સાવરકુંડલા:
આજના સ્વાર્થ અને વ્યાપારીકરણના યુગમાં જ્યાં મોટાભાગની સેવાઓ પણ વ્યવસાયનું સ્વરૂપ ધારણ કરી રહી છે, ત્યાં સાવરકુંડલાની પવિત્ર ધરતી પર છેલ્લા ૪૦ વર્ષથી એક એવી અનોખી અને નિઃસ્વાર્થ જળસેવા ચાલી રહી છે, જે સમગ્ર સમાજ માટે પ્રેરણાસ્ત્રોત બની ગઈ છે. શહેરના મધ્યભાગમાં આવેલું પ્રખ્યાત ‘ઉતાવળ હનુમાનજી પાણીનું પરબ’ વર્ષ ૧૯૮૬થી આજદિન સુધી ૩૬૫ દિવસ અને ચોવીસે કલાક અવિરતપણે લોકોની સેવા કરી રહ્યું છે.
“માનવ સેવા એ જ પ્રભુ સેવા”ના પવિત્ર સંદેશને જીવનમાં ઉતારનાર પરમ સેવાભાવી સ્વર્ગસ્થ શ્રી મામૈયાભાઈ રામભાઈ સિંધવ દ્વારા આ પાણીના પરબની શરૂઆત કરવામાં આવી હતી. સમાજ માટે કંઈક સારું કરવાની ભાવના સાથે શરૂ કરાયેલું આ સેવાકાર્ય આજે ચાર દાયકાઓ બાદ પણ એ જ શ્રદ્ધા, નિષ્ઠા અને સમર્પણ સાથે આગળ વધી રહ્યું છે. હાલ તેમના સુપુત્ર શ્રી અજયભાઈ મામૈયાભાઈ સિંધવ આ જળસેવાને અવિરત રીતે આગળ ધપાવી રહ્યા છે.
ઉનાળાની કાળઝાળ ગરમી દરમિયાન જ્યારે તાપમાન ૪૫ થી ૪૬ ડિગ્રી સુધી પહોંચી જાય છે ત્યારે સામાન્ય માણસ માટે રસ્તા પર નીકળવું મુશ્કેલ બની જાય છે. આવા સમયમાં આ પાણીનું પરબ લોકો માટે આશીર્વાદ સમાન સાબિત થાય છે. ધોમધખતા તાપમાં તરસથી વ્યાકુળ બનેલા રાહદારીઓ અહીં ઠંડું અને શુદ્ધ પાણી પીીને શાંતિ અને રાહતનો અનુભવ કરે છે. ઘણા લોકોના મુખેથી અહીં પાણી પીધા બાદ આપોઆપ આશીર્વાદના શબ્દો નીકળી પડે છે.
આ પાણીનું પરબ સાવરકુંડલાના એકદમ વ્યસ્ત અને કેન્દ્રસ્થાને આવેલું છે. તેની આજુબાજુ ગુરૂકુળ, દેવળા ગેટ, કે.કે. હાઈસ્કૂલ, હાથસણી રોડ અને મેઘજી પેથરાજ છાત્રાલય જેવા મહત્વપૂર્ણ માર્ગો આવેલા હોવાથી અહીં દિવસ-રાત લોકોની અવરજવર રહે છે. શાળામાંથી બપોરના સમયે ઘરે જતા નાના બાળકો હોય, બજારમાંથી થાકીને ઘરે પરત ફરતા વડીલો હોય કે રોજિંદા કામકાજ માટે નીકળેલા લોકો—દરેક માટે આ પરબ શીતળતા અને માનવતાનું કેન્દ્ર બની ગયું છે.
ખાસ વાત એ છે કે અહીં કોઈપણ પ્રકારનો જાતિ, ધર્મ કે વર્ણનો ભેદભાવ રાખવામાં આવતો નથી. સમાજના તમામ ૧૮ વર્ણના લોકો સમાન ભાવથી અહીં પાણી પીવે છે અને થોડો વિરામ લઈને પોતાના માર્ગે આગળ વધે છે. આ દ્રશ્ય સમાજમાં એકતા, સમાનતા અને માનવતાનો સુંદર સંદેશ આપે છે.
આધુનિક યુગમાં જ્યાં નાની સેવા પાછળ પણ પ્રસિદ્ધિ અને પ્રચારની અપેક્ષા રાખવામાં આવે છે, ત્યાં સિંધવ પરિવાર છેલ્લા ૪૦ વર્ષથી સંપૂર્ણ નિઃસ્વાર્થ ભાવથી આ જળસેવા ચલાવી રહ્યો છે. આ કાર્ય માત્ર પાણી પૂરું પાડવાનું નથી, પરંતુ સમાજમાં માનવતા, કરુણા અને સેવા ભાવનાનો દીપ પ્રગટાવવાનું કાર્ય છે.
સાવરકુંડલા પંથકની જનતા, વેપારી મંડળો તેમજ વડીલો સિંધવ પરિવારની આ અવિરત અને પવિત્ર સેવાભાવનાને હૃદયપૂર્વક બિરદાવી રહ્યા છે. લોકોનું માનવું છે કે આવી સેવાઓ સમાજ માટે પ્રેરણા બની રહે છે અને નવી પેઢીને પણ માનવસેવાના માર્ગે આગળ વધવા માટે પ્રોત્સાહિત કરે છે.
બ્યુરો ચીફ, ગુજરાત પ્રવાસી ન્યૂઝ અમદાવાદ